Pálmi til reynslu í Svíþjóð

Pálmi Rafn Pálmason, knattspyrnumaður hjá 1.deildarliðinu KA, fer til Svíþjóðar á morgun þar sem hann verður til reynslu hjá sænska liðinu GAIS. Pálmi verður laus allra mála hjá KA um áramótin en þá rennur samningur hans við Akureyrarfélagið út. GAIS er sem stendur í þriðja sæti í næstefstu deild í Svíþjóð og hefur því enn þá góða möguleika á því að komast upp í úrvalsdeildina. Tvö efstu liðin í deildinni, sem eru nú Öster og AIK, fara beint upp um deild en liðið í þriðja sæti keppir við það lið sem endar í þriðja neðsta sæti í úrvalsdeildinni, um sæti í efstu deild á næstu leiktíð.