Líkamsárásarmál naut forgangs

Líkamsárásarmál naut forgangs hjá lögreglu yfir rannsókn á máli konu sem þrír menn nauðguðu. Vika leið áður en tveir mannanna voru yfirheyrðir, þrátt fyrir að lögregla vissi deili á þeim. Hæstiréttur dæmdi þrjá menn í vikunni til að greiða konu skaðabætur vegna hópnauðgunar verslunarmannahelgina 2002. Ríkissaksóknari ákvað á sínum tíma að kæra mennina ekki þar sem ekki þóttu nægjanlegar sannanir til að sakfella mennina. Atli Gíslason, lögmaður konunnar, segir lögreglu hafa klúðrað rannsókn málsins, meðal annars með því að virða ekki fyrirmæli ríkissaksóknara um að rannsóknir ofbeldis- og kynferðisbrota njóti forgangs á önnur mál. Það leiddi til þess að tveir af þremur mönnum sem nauðguðu konunni voru ekki yfirheyrðir fyrr en viku eftir að nauðgunin var kærð. Drífa Snædal, fræðslu- og framkvæmdastýra Kvennaathvarfs, segir sorglegt hversu lítið hlutfall kærðra nauðgana leiði til ákæru og sakfellingar. Hún segir ferlið mjög erfitt fyrir konur og ekki til þess fallið að hvetja þær til að kæra nauðgun. Drífa segir að mál sem þessi þyrftu að njóta meiri forgangs við rannsókn. Hörður Jóhannesson, aðstoðaryfirlögregluþjónn hjá Lögreglunni í Reykjavík, segir verklagsreglu hjá lögreglu að rannsókn nauðgana og alvarlegra líkamsárásarmála njóti forgangs á önnur mál. Hann vildi ekkert tjá sig um hvernig forgangsröð væri ákveðin þegar fyrir lægju rannsóknir hvort tveggja, nauðgunar og alvarlegrar líkamsárásar.