Start lagði topplið Valerenga

Start vann nú áðan góðan sigur á Valerenga, 3-0 í toppslag norska fótboltans. Jóhannes Harðarson lék allan leikinn fyrir Start og Árni Gautur Arason stóð í marki Valerenga. Með sigrinum lyftir Start sér í toppsætið í deildinni á kostnað Valerenga á betri markatölu, en bæði lið hafa hlotið 44 stig eftir 22 leiki. Fyrr í dag var annar Íslendingaslagur í norska boltanum þegar Stefán Gíslason og félagar í Lyn unnu 1-0 sigur á Kristjáni Erni Sigurðssyni og félögum í Brann, en báðir léku þeir allann leiktímann með liðum sínum. Haraldur Guðmundsson kom ekki við sögu hjá Aalesund þegar liðið vann góðan útisigur á Fredrikstad 4-1.