Mourinho hræðist ekki Liverpool

Jose Mourinho segist ekki óttast að mæta Liverpool tvisvar á Anfield á innan við viku og segir að þó vissulega standi tapið í undanúrslitum meistaradeildarinnar í sínum mönnum, hafi Chelsea engu að síður unnið á Anfield í deildinni í fyrra og því sé ekkert því til fyrristöðu að endurtaka leikinn. Liverpool og Chelsea mætast á miðvikudagskvöldið í Meistaradeildinni, en eigast svo við aftur á sunnudaginn á sama velli í ensku deildinni. "Það er langt í frá auðvelt að spila á Anfield, við töpuðum þar í apríl, en við unnum leik þar í janúar svo við vitum að við getum það. Þetta eru alltaf stórir leikir og þannig leikir eru alltaf skemmtilegastir," sagði Mourinho.