Hefur ekki áhyggjur af miklu álagi

Steven Gerrard, fyrirliði Liverpool, segir að hann hafi ekki áhyggjur af því auka álagi sem fylgir þáttöku Liverpool í heimsmeistaramóti félagsliða sem fram fer í Japan dagana 15.-18 desember næstkomandi.

"Fólk talar um að við verðum lurkum lamdir eftir leikjaálagið, en ég held að ef við vinnum þetta mót, geti það aðeins hjálpað okkur í framtíðinni," sagði Gerrard.

"Það eru tvær hliðar á málinu. Það er hægt að segja að þáttaka okkar í mótinu sé neikvæð og taki frá okkur orku í öðrum keppnum, en ég kýs að líta þannig á að við getum nælt okkur í aukið sjálfstraust með því að vinna þessa keppni. Þjálfarinn hefur líka sagt að hann muni dreifa álaginu á alla liðsmenn í vetur og gefa öllum tækifæri til að hvílast á einhverjum tímapunkti," sagði Gerrard.