Skjóttu mig ef þú vilt verða frægur

Argentíska knattspyrnugoðið Diego Maradona komst í hann krappann á flugvelli í Brasilíu í gær, þegar hann reyndi að troða sér um borð í flugvél eftir að hafa mætt of seint. Hann var handtekinn fyrir að vera með leiðindi á vellinum eftir að ljóst var að hann næði ekki fluginu, en þótti móttökur öryggisvarða heldur glannalegar.

"Öryggisverðirnir héldu eflaust að við værum vopnaðir eða eitthvað slíkt. Einn þeirra otaði byssu í andlitið á mér og ég sagði honum að skjóta bara, ef hann langaði svona mikið að verða frægur," sagði Maradona, sem var fljótlega sleppt og fékk loks að fljúga burt úr landinu.