Náðum að rífa okkur upp

"Þetta var frábær endir á stórkostlegu tímabili," sagði Margrét Lára Viðarsdóttir eftir sigurinn í gær. "Þetta var hörkuleikur, er þetta ekki það sem áhorfendur vilja? Það er alltaf verið að gagnrýna kvennaboltann en ég held að fólk geti dregið þau orð til baka. Tvö frábær lið mættust í leik sem hefði getað endað á hvorn veginn sem var," sagði Margrét en þess má geta að 819 áhorfendur sáu þennan stórskemmtilega leik í Laugardalnum í gær.

"Liðið spilaði vel í heild sinni en ég neita því ekki að það er frábær tilfinning að hafa náð að skora þrennu. Við höfum ekkert mjög reynslumikið lið, það eru margar óreyndar stelpur og við lentum í erfiðleikum eftir að hafa komist yfir. En við náðum að rífa okkur upp og klára þetta. Við þurftum ekki að búa til tilfinninguna eftir þennan leik eins og við þurftum þegar við fengum Íslansdmeistarabikarinn og það er allt annað," sagði Margrét Lára.