Orðað við tvo franska leikmenn

Tveir franskir knattspyrnumenn hafa nú verið sterklega orðaðir við Manchester United. Annar þeirra, miðjumaðurinn Franck Ribery hjá Marseille, fullyrðir þetta í samtali við breska blaðið News of the world. Hinn leikmaðurinn er varnarmaðurinn Patrice Evra hjá Mónakó.

"Umboðsmaður minn hefur verið í sambandi við Manchester United og ég veit að Tottenham Hotspurs hefur einnig verið að hafa samband við hann," sagði Ribery, sem er 22 ára og á að baki U-21 árs landsleiki fyrir Frakkland. Þá segir umboðsmaður Evra að Inter Milan hafi einnig mikinn áhuga á að fá skjólstæðing sinn til liðs við sig.