Úrvalsdeildarliðin í vandræðum en sluppu við áföll

Nokkur úrvalsdeildarlið lentu í vandræðum gegn smærri liðum í enska bikarnum í dag, en þó sluppu þau við stóráföll. Everton náði aðeins jafntefli 1-1 gegn Milwall, Middlesbrough gerði jafntefli við Nuneaton 1-1, Birmingham gerði markalaust jafntefli við Torquay og West Brom gerði 1-1 jafntefli við Reading. Að öðru leiti náðu úrvalsdeildarliðin að leggja andstæðinga sína að velli.

Blackburn lagði QPR 3-0, Chelsea lagði Huddersfield 2-1 þar sem Eiður Smári skoraði sigurmarkið, Portsmouth sigraði Ipswich 1-0, Manchester City lagði Scunthorpe 3-1 eftir að hafa lent undir í leiknum og þar var Robbie Fowler hetja City og skoraði þrennu, Newcastle sigraði Mansfield 1-0, West Ham lagði Norwich 2-1, Charlton lagði Sheffield Wednesday 4-2 og Bolton vann sigur á Watford 3-0. Íslendingaliðið Stoke gerði markalaust jafntefli á heimavelli sínum við utandeildarliðið Tamworth.