McGrady meiddur

Tracy McGrady, leikmaður Houston Rockets, mun missa af í það minnsta tveimur leikjum með liði sínu eftir að hann var fluttur á sjúkrahús með mikla bakverki eftir leik Houston og Denver á sunnudagskvöldið. Þetta eru ekki góð tíðindi fyrir Houston sem er einnig án Yao Ming vegna meiðsla.

Þessi meiðsli eru ekkert nýnæmi hjá McGrady, en hann hefur þegar misst úr átta leiki með liðinu í vetur og töpuðust þeir allir. Áður en meiðslin tóku sig upp á ný um helgina, hafði McGrady skorað yfir 30 stig í fimm leikjum í röð.