Vorum hársbreidd frá því að kaupa Ronaldo

Luciano Moggi, yfirmaður knattspyrnumála hjá ítölsku meisturunum Juventus, hefur staðfest það sem Cristiano Ronaldo sagði fyrir nokkru, að félagið hafi verið hársbreidd frá því að landa honum þegar hann lék með Sporting Lissabon á sínum tíma.

"Hann var búinn að samþykkja að ganga til liðs við okkur og allt var í raun klappað og klárt, þegar Marcelo Salas neitaði að fara til Portúgal í skiptum sem partur af samningnum og því varð ekkert úr þessu," sagði Moggi, en félagið nagar sig eflaust í handarbökin í dag að hafa misst af Portúgalanum snjalla sem hefur leikið vel með Manchester United síðan hann gekk í raðir félagsins.