Artest skipt fyrir Stojakovic?

Fjölmiðlar í Bandaríkjunum eru nú uppfullir af því að Indiana Pacers og Sacramento Kings séu komin á fremsta hlunn með að skipta á þeim Ron Artest og Peja Stojakovic mjög bráðlega. Sagt er að Indiana sé tilbúið að skipta strax, en að boltinn sé hjá forráðamönnum Sacramento og að þeir séu enn að hugsa málið.

Artest hefur ekki spilað með Indiana í margar vikur eftir að hann var settur út úr liðinu í kjölfar þess að hann bað um að verða skipt í burtu. Stojakovic hefur átt erfitt uppdráttar á þessu ári vegna meiðsla, en hann lýsti því þó yfir við staðarblað í Sacramento að hann vildi ekki fara frá félaginu.