Shearer vill ekki taka við af Souness

Framherjinn Alan Shearer hjá Newcastle, sem nú gegnir stöðu aðstoðarstjóra hjá félaginu tímabundið, segir að hann hafi ekki áhuga á að verða næsti knattspyrnustjóri Newcastle.

"Ég vil að það komi skýrt fram að ég mun ekki sækjast eftir því að verða næsti knattspyrnustjóri Newcastle, enda væri það allt of snemmt fyrir mig. Ég hugsa bara um hvað er best fyrir félagið og hvorki ég né Glenn Roader ætlum okkur að taka þetta starf að okkur til framtíðar. Ég finn til með Graeme Souness. Hann var búinn að vinna hörðum höndum að því að koma þessu liði á rétta braut, en mikil meiðsli í hópnum gerðu honum ákaflega erfitt fyrir," sagði Shearer.