Við erum fullir sjálfstrausts

Felix Magath, stjóri Bayern Munchen, segir sína menn fulla sjálfstrausts fyrir leikinn gegn AC Milan í Meistaradeildinni annað kvöld, en Bayern hefur unnið alla 15 leiki sína á nýja heimavellinum sem tekinn var í notkun í sumar.

Bayern og Milan hafa þrisvar mæst áður heima og heiman í Meistaradeildinni og hefur ítalska liðið alltaf haft betur. Magath hefur þó engar áhyggjur af því.

"Mínir menn eru mjög hungraðir í sigur og geta ekki beðið eftir leiknum. Við erum þess fullvissir að við náum að komast áfram í keppninni, enda hefur liðinu gengið einstaklega vel á nýja heimavellinum. Juventus hefur þegar sagt að stemmingin á vellinum sé frábær og ég er viss um að leikmenn Milan taka í sama streng," sagði Magath.

Hinir reyndu varnarmenn Milan, Cafu og Paolo Maldini eru báðir tæpir vegna meiðsla og þá er fyrirliði Bayern Oliver Kahn einnig tæpur vegna meiðsla, en segist stefna að því að spila leikinn.