Færri íbúðalán

Heildarútlán Íbúðalánasjóðs námu alls 3 milljörðum króna í síðasta mánuði. Þar af voru rúmlega 2,8 milljarðar sem tilheyra almennum lánum og tæpar 200 milljónir sem tilheyra leiguíbúðalánum. Þetta er samdráttur á milli mánaða og sama tíma í fyrra en það sem af er árinu hafa umsvif á fasteignamarkaði verið minni en á sama tíma í fyrra.

Í mánaðarskýrslu Íbúðalánasjóðs kemur fram að þetta kunni m.a. að eiga sér skýringu í hærri vaxtakjörum og að aðgengi að lánsfjármagni hefur dregist saman.

Hámarkslán Íbúðalánasjóðs hækkuðu úr 15,9 milljónum í 18 milljónir 18. apríl síðastliðinn. Í mánaðarskýrslunni segir að lánin muni áfram vera bundin við brunabótamat en að fasteignamat lóðar komi nú til viðbóta við brunabótamatið. Í samræmi við breytingu laga um húsnæðislán frá 2004, um að hámarkslán skuli vera 90 prósent af sex mánaða meðaltalsverði íbúða á höfuðborgarsvæðinu, þá hefði hámarkslán sjóðsins átt að vera 21,3 milljónir í dag. Hámarkslánin höfðu hins vegar ekki hækkað í heilt ár á meðan fasteignaverð á höfuðborgarsvæðinu hefur hækkað um 30 til 40 prósent.

„Lánin eru enn bundin við brunabótamat og þar sem fasteignaverð á höfuðborgarsvæðinu hefur farið langt fram úr brunabótamati er ekki hægt að færa sterk rök fyrir því að hækkun hámarkslánsins í 18 milljónir sé þensluhvetjandi aðgerð," segir í mánaðarskýrslunni og bent á að lántakandi hafi möguleika á ótakmarkaðri lántöku í bankakerfinu, svo sem veðrými leyfir, þannig að þessi hækkun á hámarksláni Íbúðalánasjóðs ætti að hafa mjög lítil sem engin efnahagsleg áhrif.

Áætlun Íbúðalánasjóðs gerir ráð fyrir að útlán sjóðsins verði 14-15 milljarðar króna frá öðrum ársfjórðungi og að útgáfa íbúðabréfa verði 10-11 milljarðar á sama tímabili. Áætlað er að endurskoða áætlanir vegna minnkandi umsvifa á fasteignamarkaði og má gera ráð fyrir að nýjar endurskoðaðar áætlanir verði birtar um næstu mánaðamót.