Heildarafli skipa minni í ár

Heildarafli íslenskra skipa í síðasta mánuði, metinn á föstu verði, var 17,6 prósentum minni en á sama tíma í fyrra. Aflinn nam 80.105 tonnum samanborið við 117.612 tonn í apríl í fyrra. Að sögn Hagstofunnar hefur aflinn dregist saman um 15,5 prósent á milli ára, sé hann metinn á föstu verði. Heildaraflinn fyrstu fjóra mánuði ársins var 469.282 tonn en hann var 870.117 tonn í fyrra.

Botnfiskaflinn í síðasta mánuði var rúm 44.400 tonn en í apríl í fyrra var hann 51.400 tonn. Þar af var þorskaflinn tæp 17.400 tonn og dróst hann saman um 3.300 tonn á milli ára. Ýsuaflinn dróst saman um 2.900 tonn á milli ára en hann var ríflega 7.500 tonn í ár. Þá var karfaaflinn tæp 8.000 tonn sem er rúmlega 1.700 tonnum minni afli en í apríl í fyrra. Það sem af er árinu nemur afli botnfisks rúmum 184.600 tonnum sem er 11.800 tonnum minni afli en 2005.

Kolmunnaaflinn í apríl nam 32.700 tonnum samanborið við rúm 62.300 tonn í apríl 2005. Í lok apríl höfðu borist á land samtals 87.400 tonn sem er tæplega 21.000 tonnum meira en á sama tíma í fyrra.

Þá er humarvertíðin hafin og hafa borist á land tæp 300 tonn sem er svipað og fyrstu fjóra mánuði ársins 2005, að sögn Hagstofunnar.