Sigurerni sleppt í stóra búrið

Nú dvelur í Fjölskyldu- og húsdýragarðinum haförn sem lenti í hremmingum en ung stúlka Sigurbjörg S. Pétursdóttir á Grundarfirði kom honum til hjálpar.

Hremmingar arnarins, sem nefndur var eftir Sigurbjörgu, Sigurörn voru í raun tvíþættar. Annars vegar var hann grútarblautur en hins vegar vantar á hann nánast allar stélfjaðrir. Er það ráðgáta hvernig stendur á því, en það tekur langan tíma fyrir þær að myndast aftur. Það gæti því farið svo að hann muni dvelja í nokkurn tíma í garðinum, jafnvel á annað ár.

Þorvaldur Þór Björnsson á Náttúrufræðistofnun Íslands hefur þvegið erninum nokkrum sinnum og er nú komið að því að sleppa honum út í stóra búrið í garðinum en það var gert í morgun. Þorvaldur hafði orð á því eftir þvottana að Sigurörn væri einstaklega spakur örn. Stóra búrið hefur tekið þó nokkrum breytingum svo sem best fari um örninn. Þar hefur verið reist skýli og settir upp tveir bitar sem hann geti flögrað á milli. Gestir garðsins fá um leið og honum verður sleppt í búrið frábært tækifæri að sjá þennan mikla fugl með berum augum.

Sigurörn er 6 ára gamall ari (karlfugl) en á þeim aldri verða ernir kynþroska. Hann var merktur, og ber það merki enn, í arnarhreiðri í Faxaflóa fyrir sex árum síðan. Ólíkt öðrum örnum á Íslandi verður Sigurörn að teljast vanur manninum því þetta er nú í þriðja sinn sem hann er undir manna höndum. Fyrst þegar hann var merktur sem ungi en síðan fannst hann á fyrsta ári grútarblautur.

Sigurörn er ekki eini örninn sem dvelur í garðinum því á toppi fallturnsins Níðhöggs í 15 metra hæð trónir Veðurfölnir. Vænghafið á honum er það sama og á fullvaxinni össu um það bil 240 cm.

Sigurörn er í garðinn kominn í tengslum við verkefnið "Villt dýr í hremmingum" sem fyrirtækið Fálkinn er bakhjarl fyrir.