Fiskidagurinn mikli um helgina

Fjölskylduhátíðin "Fiskidagurinn mikli "verður haldinn hátíðlegur í sjötta sinn laugardaginn 12. ágúst á Dalvík. Frá upphafi hefur markmiðið með þessum degi verið að fá fólk til þess að koma saman, hafa gaman, borða fisk og að allt á hátíðarsvæðinu sé frítt, matur skemmtun og afþreying. Dagurinn er með svipuðu sniði og áður en alltaf bætast nýjar hugmyndir við t.d. Fiskisúpukvöldið mikla sem var í fyrsta skipti í fyrra og sló svo sannarlega í gegn. Á föstudagskvöldinu fyrir Fiskidaginn mikla buðu íbúar gestum og gangandi heim til sín í fiskisúpu og vinalegheit. Ef tveir kyndlar voru logandi fyrir utan húsið var þar súpa í boði, 4800 gestir skrifuðu í gestabækur í um 30 húsum. Það er mikil eftirvænting fyrir þessari uppákomu í ár ekki síst hjá þeim sem bjóða heim og hafa margir undirbúið sig vel og lengi, t.d með því útvega sér stærri potta, þróa réttu uppskriftina og sumir verða með tónlistaratriði í sínum görðum. Allir sem eiga þess kost bjóða aftur uppá súpu í ár, að þeirra sögn var einstakt andrúmsloft sem myndaðist á síðasta ári, róleg og yfirveguð stemmning þar sem fjölskyldufólk rölti milli húsa fékk súpu og kynntist nýju fólki. Í ár verður boðið uppá súpu í um 40 húsum og þess má geta að við eigum von á góðum gestum sem sækja súpuvini heim.

Ein af nýjungum Fiskidagsins mikla í ár er að allar götur á Dalvík fá ný nöfn. Í eina viku heita göturnar eftir þekktum og minna þekktum fiskum t.d. breytist Mímisvegur í Risarækjuveg, Karlsrauðatorg í Blálöngutorg og Svarfaðarbraut í Lúðubraut. Nýju merkingarnar verða settar upp við hlið gömlu nafnanna og skemmtileg hugmynd er að fá sér göngutúr um bæinn og sjá hvað göturnar heita. Fulltrúar gatnanna drógu nöfnin í sundlaug Dalvíkur fyrir stuttu. Herra Ólafur Ragnar Grímsson forseti Íslands er heiðursgestur Fiskidagsins mikla og mun hann m.a flytja ávarp á aðalsviði um miðjan daginn. Það gleður okkur mjög að fá forsetahjónin í heimsókn og bjóðum við þau innilega velkomin í Dalvíkurbyggð.

Í ár eru 14 réttir á matseðlinum og mikið af nýjungum m.a. má finna rétti sem fyrirfinnast ekki annarsstaðar í heiminum líkt og saltfiskvöfflur, nýjung sem á eftir að slá í gegn svo um munar, vöfflurnar verða bakaðar á staðnum í 50 vöfflujárnum og bornar fram með súrsætri sósu. Boðið verður uppá spriklandi nýja bleikju, sushi, 2-3 aþjóðlega rétti. Við ætlum að slá íslandsmet, þegar framreidd verður asísk fiskisúpa í stærsta súpupotti landsins. Skemmti- og afþreyingar dagskráin hefur aldrei verið eins fjölbreytt og nú, dagskrá verður á tveimur sviðum á hátíðarsvæðinu allan daginn ásamt á þriðja tug fjölskylduvænna atriða á hátíðarsvæðinu sjálfu. Við gerum ráð fyrir að fiskasýningin verði ein sú stærsta frá upphafi og ein sú stærsta í Evrópu með hátt í 200 tegundir af ferskum fiski. Það koma um 200 aðilar fram á sviðunum og hátíðarsvæðinu almennt þennan dag og um 300 sjálfboðaliðar koma að deginum. 16 sjálfboðaliðar frá 9 löndum frá SEEDS sjálfboðasamtökunum verða á vegum Fiskidagsins mikla í tvær vikur í Dalvíkurbyggð og aðstoða við undirbúning Fiskidagsins mikla og almenna snyrtingu og því sem til fellur. Þeir munu eyða degi með meistarakokknum Friðriki V. þar sem þau fara yfir fiskuppskriftir frá sínum löndum og mun Friðrik í samvinnu við hópinn velja 2 - 3 rétti sem verða í boði á Fikidaginn mikla.

Færeyski kútterinn Jóhanna TG 326 er væntanlegur til Dalvíkur fimmtudaginn 10. ágúst og mun stoppa fram yfir Fiskidaginn mikla. Jóhanna er ein þeirra færeysku kúttera sem sigldu milli Íslands og Skotlands með fisk á stríðsárunum. 18 manns verða um borð og munu þeir taka þátt hátíðarhöldum í tengslum við Fiskidaginn mikla. Eigendur kúttersins eru meðal stærstu viðskiptavina Sæplasts á Dalvík og koma þeir til Dalvíkur í samvinnu við þá.

Fiskidagurinn mikli hefur heiðrað einstaklinga eða ákveðin tímabil frá upphafi eða í fimm ár. Undanfarið hefur verið unnið að því að smíða minnismerki um hverja heiðrun, ásamt einu merki þar sem fram kemur tilurð Fiskidagsins mikla. Fimmtudaginn 10. ágúst kl 18.00 mun Svanfríður Jónasdóttir afhjúpa minnismerkin neðan byggðasafnins. Laugardaginn 12.ágúst bætist svo í safnið eftir heiðrun Fiskidagsins mikla 2006. Heiðursverðlaunasmiður er Jóhannes Hafsteinsson, steypumót er smíðað af Óskari Pálmasyni hjá Tréverk Dalvík, steypuvinnu og efni sér Steypustöð Dalvíkur um, textinn er unnin af Jóhann Antonssyni og um laserskurð sér fyrirtækið Boði hf.

Það er von aðstandenda Fiskidagsins mikla að allir skemmti sér vel, njóti matarins og þeirra atriða sem í boði eru og síðast en ekki síst vonum við að allir eigi góðar og ljúfar stundir með fjölskyldunni og vinum. Fiskidagurinn mikli er fjölskylduhátíð þar sem hvorki er pláss fyrir dóp né drykkjulæti. Frá upphafi höfum við haft frábæra gesti sem hafa gengið einstaklega vel um og fyrir það viljum við þakka. Að kvöldi Fiskidagsins mikla, kl 23.30 verður risaflugeldasýning á hafnargarðinum á Dalvík. Sýningin er í boði Sparisjóðs Svarfdæla og Björgunarsveitin á Dalvík mun setja sýninguna upp og sjá um hana.

Matseðilinn, alla dagskrá, upplýsingar og fréttir er hægt að skoða á heimasíðu dagsins www..julli.is - Allar nánari upplýsingar veitir framkvæmdastjóri Fiskidagsins mikla Júlíus Júlíusson í síma 8979748.