Alvarlega slasaður eftir árekstur á Kringlumýrarbraut

Ökumaður fólksbifreiðar er alvarlega slasaður eftir bílslys á Kringlumýrarbraut í kvöld. Hann er fótbrotinn á báðum fótum en er ekki talinn í lífshættu.

Slysið varð á áttunda tímanum í kvöld. Ökumaður fólksbifreiðar sem ekið var norður Kringlumýrarbraut, virðist hafa misst stjórn á bíl sínum, kastast yfir umferðareyju og lent framan á jeppabifreið sem ekið var suður Kringlumýrarbraut. Við þetta valt fólksbíllinn. Talið er að fólksbifreiðinni hafi verið ekið allt of hratt. Beita þurfti klippum til að ná ökumanni fólksbílsins út úr bifreiðinni en ökumaður jeppans slapp ómeiddur.

Vegna slyssins þurfti lögregla að loka Kringlumýrarbraut til suðurs rétt sunnan við Bústaðabrú í hátt á aðra klukkustund.