Bush tapar í þingkosningunum -samkvæmt skoðanakönnun

Bush forseti og Repúblikanaflokkur hans munu missa meirihluta sinn á þingi, í kosningunum sem fram fara í næsta mánuði, samkvæmt skoðanakönnun sem tímaritið Newsweek birti í dag. Ef það gengur eftir er viðbúið að Bush þurfi að gera verulegar breytingar á stefnu sinni í Írak.

Fimmtíu og fimm prósent aðspurðra sögðust mundu kjósa demókrata, ef gengið væri til kosninga í dag. Fimmtíu og sjö prósent voru óánægð með frammistöðu forsetans sjálfs og aðeins þrjátíu og fimm prósentum þótti hann standa sig vel. Þá voru sextíu og sjö prósent aðspurðra óánægð með þróun mála í Írak.