Lego annar ekki eftirspurn

Danski leikfangaframleiðandinn Lego á í mestu erfiðleikum með að anna eftirspurn vegna niðurskurðar hjá fyrirtækinu. Talsmaður fyrirtækisins segir flestar vörur Lego uppseldar og geti fyrirtækið ekki sinnt jólasölu með góðu móti. Búist er við að Lego verði af háum fjárhæðum vegna þessa.

Það eru uppsagnir á starfsfólki hjá Lego á síðastliðnum fjórum árum sem hefur komið niður á framleiðslunni. „Nú eru flestar vinsælustu vörur okkar uppseldar," segir talsmaður fyrirtækisins og bætir við að fyrirtækið hafi ekki náð að aðlagast hagræðingu í rekstri. Á meðal hagræðingarinnar er flutningur á störfum frá Danmörku til Tékklands og Mexíkó þar sem laun eru lægri. Talsmaður Lego neitaði hins vegar að tjá sig um það hversu mörgum pöntunum fyrirtækið gæti ekki sinnt.

Danska viðskiptablaðið Börsen telur líkur á að Lego gæti orðið af 750 milljónum danskra króna, jafnvirði rúmlega 8,7 milljarða íslenskra króna, vegna tapaðrar sölu um jólin.