Foreldrar fá bréf um glannaskap barna sinna

Lögreglan á Akranesi sendir nú foreldrum ungra ökumanna, sem gerast brotlegir í umferðinni, bréf. Lögreglan segir mikið hafa borið á brotum ungra ökumanna og ekki hafa allir látið sér segjast þrátt fyrir afskipti lögreglunnar.

Því var ákveðið að grípa til þess ráðs að senda forráðamönnum ökumanna undir 18 ára aldri bréf ef börn þeirra gerast brotleg. Í bréfinu er foreldrum skýrt frá því að barnið hafi gerst brotlegt og hvort það geti átt von á sekt eða ekki. Lögreglan sendi út fyrstu bréfin í vikunni hefur í framhaldinu fengið jákvæð viðbrögð frá foreldrum.