Trichet varar við aukinni verðbólgu

Jean-Claude Trichet, bankastjóri evrópska seðlabankans, varaði við því á fundi seðlabankastjóra 10 stærstu iðnríkja heims í Ástralíu í dag að verðbólga geti farið úr böndunum á næsta ári þrátt fyrir lækkun á eldsneytisverði. Hann sagði bankann fylgjast grannt með þróun mála í Evrópu.

Þá lagði hann jafnframt áherslu á mikilvægi þess að nota stýrivexti sem tæki bankanna til að halda verðlagi stöðugu.

Evrópski seðlabankinn hefur hækkað stýrivexti sína um 25 punkta fimm sinum síðan í desember í fyrra. Þeir standa nú í 3,25 prósentum og búast greiningaraðilar við að þeir verði hækkaðir einu sinni enn um 25 punkta fyrir árslok.

Fleiri bankar hafa fylgt í kjölfarið og hækkað stýrivexti á árinu, m.a. Englandsbanki, Seðlabanki Bandaríkjanna og Seðlabanki Japans, sem snéri baki við fimm ára viðvarandi núllvaxtastefnu sinni í júlí.