Töluvert tjón í innbroti hjá Bræðrunum Ormsson

Töluvert tjón varð í raftækjaverslun Bræðranna Ormsson í Síðumúla í nótt þegar þjófur eða þjófar réðust þar inn og höfðu á brott með sér tvö dýr sjónvarpstæki.

Við innbrotið virðist grjóti hafa verið kastað inn um rúðu á versluninni og skemmdust raftæki og húsmunir við það. Gróflega er áætlað að tjónið nemi á þriðju milljón króna enda um dýran og viðkvæman varning að ræða.

Sá sem fór inn í verslunina virðist hafa skorið sig á glerinu því blóð var á rúðunni þar sem farið var inn. Lögregla leitar því að minnsta kosti eins særðs þjófs en enginn hafði verið handtekinn vegna málsins nú skömmu fyrir fréttir.