Öxnadalsheiði lokuð vegna veðurs

Lögreglan á Akureyri var rétt í þessu að senda frá sér tilkynningu um að vegurinn á Öxnadalsheiði hefði lokast. Starfsmenn vegagerðarinnar eru að störfum við að aðstoða bíla sem fastir eru en einn flutningabíla er fastur þversum á veginum.

Tilkynningin hljómar á þessa leið: "Á Öxnadalsheiði geysar nú óveður og hefur vegurinn lokast efst í Bakkaselsbrekku þar sem nokkur fjöldi flutningabíla kemst ekki leiðar sinnar vegna hálku og er a.m.k einn þeirra þversum á veginum og lokar honum. Starfsmenn Vegagerðar eru þarna að störfum en veðurhæð er mikil og skyggni takmarkað. Fólki er bent á að fylgjast vel með vef Vegargerðarinnar sem og á Textavarpinu þar sem allar upplýsingar er að finna um stöðu mála."