Svíþjóð fyrsti andstæðingurinn á EM

Ísland var í gær dregið í riðil með Svíþjóð, Frakklandi og Slóvakíu á EM í handbolta sem fer fram í Noregi á næsta ári.

Ísland var í öðrum styrkleikaflokki og mátti því ávallt búast við sterkum andstæðingi úr þeim fyrsta þar sem Frakkar voru. Svíþjóð var langsterkasta liðið úr fjórða styrkleikaflokki og vildu því margir forðast sænska liðið.

Á móti kemur að Slóvakía er ekki hátt skrifað í handboltanum en Einar Þorvarðarson, framkvæmdastjóri HSÍ, er samt varkár í yfirlýsingum sínum.

„Ég þekki ekki nógu vel til Slóvakíu. Liðið vann Úkraínu nokkuð sannfærandi í undankeppninni og geri ég mér ekki alveg grein fyrir hvað gerðist þar,“ sagði Einar.

„Þetta mót er samt einfaldlega þannig að það eru engir leikir auðveldir. Öll liðin eru sterk og held ég að við getum vel unað við þetta.“

Ísland leikur í D-riðli sem verður leikinn í Þrándheimi. Ef Ísland kemst áfram í milliriðilinn heldur liðið áfram að spila í Þrándheimi ásamt þremur efstu liðunum í C-riðli. Þar leika Spánn, Þýskaland, Ungverjaland og Hvíta-Rússland.

Norðmenn völdu að forðast bæði C- og D-riðil og á endanum völdu þeir að spila í B-riðli með Dönum, Rússum og Svartfellingum.

A-riðil skipa svo lið Króatíu, Slóveníu, Póllands og Tékklands.

Íslenska liðið mætir fyrst Svíum hinn 17. janúar. Því næst Slóvakíu annaðhvort 18. eða 19. janúar en annar þessara daga er leikdagur og hinn frídagur.

Hinn 20. janúar mætir Ísland svo Frökkum sem eiga titil að verja á mótinu.