Páll Óskar verður kóngurinn á brúðkaupsdaginn mikla.

„Ég er þríbókaður, eitt brúðkaup í Skorradal og tvö í bænum. En það eru ennþá að berast fyrirspurnir frá fólki um hvort ég sé laus þennan daginn,“ segir Hjörleifur Valsson, fiðluleikari en hann verður á þönum þegar hinn ógnvænlegi dagur, 07.07.07, rennur upp.

Eins og komið hefur fram í Fréttablaðinu má reikna með algjörri sprengju í kirkjum landsins þegar íslensk pör flykkjast í guðshúsin til að láta pússa sig saman á þessari æði sérstöku dagstetningu. Tónlistarmenn fara ekki varhluta af þessum degi og margir hverjir hafa sömu sögu og Hjörleifur að segja.

Friðrik Ómar Hjörleifsson var til að mynda fjórbókaður þennan daginn. „Ég syng þrjú lög við hverja athöfn,“ segir Friðrik sem taldi sig vera nokkuð góðan; hann vissi í það minnsta af fáum skilnuðum hjá brúðhjónum sem hann hefði sungið fyrir. Friðrik bætti því síðan við að jafnan væri mest beðið um lagið „Hef ég sagt það hátt“ sem söngvarinn gaf út fyrir nokkru.

Bjarni Arason er ekki minna bókaður en Friðrik Ómar. „Jú, jú, ég er að fara syngja í fjórum brúðkaupum þennan daginn og svo í einni veislu seinna um kvöldið,“ sagði Bjarni sem hefur orðið mikla reynslu af slíkum söng enda verið að í þó nokkur ár. Sigrún Hjálmtýsdóttir, Diddú, tjáði Fréttablaðinu að hún væri líka bókuð í fjögur brúðkaup, þar af eitt í Stykkishólmi. „Ég tek oftast þrjú lög og einn sálm en í einu brúðkaupinu syng ég fjögur lög og einn sálm. Slíkt jaðrar bara við tónleika,“ sagði Sigrún og skellti upp úr.

Konungurinn af þeim sem Fréttablaðið ræddi við var hins vegar bróðir Diddúar, Páll Óskar Hjálmtýsson, en hann og hörpuleikarinn Monica eru allt að því fáránlega vinsæl. „Ég byrja klukkan ellefu um morguninn í Grindavíkurkirkju og verð að til klukkan átta um kvöldið,“ segir Páll sem taldist til að þetta væru í kringum sjö brúðkaup. „Ég reyni að hafa einn og hálfan tíma á milli athafna og ætli ég reyni ekki bara að sofa á milli enda er ég að fara plötusnúðast á Nasa seinna um kvöldið.“