Toppliðin töpuðu sínum fyrstu stigum

Valur og KR eru enn jöfn á toppi Landsbankadeildar kvenna eftir 1-1 jafntefli á Valbjarnarvelli í gær. Hrefna Huld Jóhannesdóttir kom KR yfir snemma í leiknum en Margrét Lára Viðarsdóttir jafnaði metin í þeim síðari.

KR-ingar komu Valsmönnum í opna skjöldu á fjórtándu mínútu þegar Hrefna Huld skoraði eftir laglegan undirbúning Hólmfríðar Magnúsdóttur. Skot Hrefnu var hnitmiðað og fast og kom Guðbjörg Gunnarsdóttir engum vörnum við.

Leikmenn Vals létu sér þó ekki segjast og pressuðu stíft á vörn KR, sem náði þó að halda mjög vel. Miðverðirnir Agnes Árnadóttir og þá sérstaklega Alicia Wilson vörðust þó afar vel og gáfu snöggum sóknarmönnum Vals ekkert eftir.

Besta færi Vals í fyrri hálfleik fékk Margrét Lára en hún skaut hátt yfir úr miðjum teignum eftir að hafa fengið laglega sendingu frá Guðnýju Óðinsdóttur. Þetta gerðist á 21. mínútu og skömmu síðar virtist brotið á Margréti Láru í vítateignum en ekkert var dæmt. Hlúa þurfti að henni í dágóðan tíma en hún gat haldið áfram leik skömmu síðar.

Það voru þó leikmenn KR sem voru nær því að auka muninn fyrir leikhlé því þeir áttu besta færi hálfleiksins. Hólmfríður átti á lokamínútu hálfleiksins skyndilega þrumuskot sem hafnaði í þverslánni en Guðbjörg virtist varla búast við skotinu.

KR byrjaði síðari hálfleik af krafti og Hólmfríður átti skalla að marki strax á 48. mínútu eftir horn Eddu Garðarsdóttur. Valsmenn neyddust til að bjarga á línu og var Málfríður Erna Sigurðardóttir þar að verki.

Valsmenn héldu þó sínu striki og uppskáru mark á 64. mínútu. Margrét Lára skoraði það mark með föstu skoti.

Bæði lið áttu sín færi eftir þetta en það besta fékk Dóra María Lárusdóttir. Hún fékk sendingu frá Nínu Ósk Kristinsdóttur sem færði sér mistök í vörn KR í nyt en hin stórefnilega Íris Dögg Gunnarsdóttir var vel á verði í markinu.

„Ég er bara hundfúl með úrslit leiksins,“ sagði Elísabet Gunnarsdóttir, þjálfari Vals. „Við áttum miklu fleiri færi í þessum leik og áttum að vinna hann. Ég var mjög óánægð með varnarleikinn en við sköpuðum okkur aftur á móti fullt af færum og áttum að nýta þau. Við vorum ekkert góðar í dag en áttum samt að vinna.“

Þjálfari KR, Helena Ólafsdóttir, sagði úrslit leiksins nokkuð sanngjörn, þegar á heildina er litið. „Ég hefði auðvitað viljað fara heim með þessa forystu sem við vorum komin með en úrslitin kannski sanngjörn. Við megum vera mjög ánægðar með baráttu leikmanna og stelpurnar gáfu allt það sem þær áttu í leikinn. Ég ætlaði liðinu sigur en jafntefli er betra en tap.“