Framkvæmdastjóri HMV hættir í kjölfar tapreksturs

Framkvæmdastjóri bresku tónlistar- og bókaverslanakeðjunnar HMV hefur sagt upp störfum frá og með næstu mánaðamótum. Að sögn breska dagblaðsins Telegraph er taprekstur fyrirtækisins á síðasta rekstrarári, sem lauk í október í fyrra, helsta ástæða brotthvarfs framkvæmdastjórans.

Fyrirtækið skilaði 24,5 milljóna punda eða rúmlega 3,4 milljarða króna tapi fyrir skatta á tímabilinu. Þetta er nokkur viðsnúningur frá 2,8 milljóna punda eða 392,7 milljóna króna hagnaði fyrirtækisins á sama tíma fyrir ári.

Stjórn fyrirtækisins sendi frá sér neikvæða afkomuviðvörun í fyrra þar sem greint var frá því að búast mætti við samdrætti í afkomu fyrirtækisins vegna minni sölu á seinni hluta árs. Verslunin greip til ýmissa aðgerða til að sporna gegn samdrættinum, meðal annars með því að veita afslátt á tónlistardiskum og DVD-mynddiskum. Það bar hins vegar lítinn árangur.

Forstjóri HMV mun sinna starfi fráfarandi framkvæmdastjóra þar til nýr eftirmaður kemur í leitirnar, að sögn Telegraph.