Verðbólgan mælist 6,9 prósent

Vísitala neysluverðs hækkaði um 0,26 prósent á milli mánaða, samkvæmt útreikningum Hagstofu Íslands. Þetta jafngildir því að verðbólgan hafi lækkað úr 7,0 prósentum í 6,9 prósent síðastliðna 12 mánuði.

Verðbólga mælist sem fyrr segir 6,9 prósent án húsnæðis um 6,0 prósent. Undanfarna þrjá mánuði hefur vísitala neysluverðs hækkað um 0,3 prósent sem jafngildir 1,1 prósenta verðbólgu á ári

Greiningardeildir viðskiptabankanna voru ekki á einu máli í spám sínum og gerðu ráð fyrir allt frá óbreyttri vísitölu neysluverðs á milli mánaða til 0,2 prósenta hækkunar og að verðbólga gæti farið niður í allt að 6,6 prósent.

Greiningardeild Glitnis spáði því undir lok síðustu viku að vísitala neysluverðs héldist óbreytt á milli desember og janúar og gerði ráð fyrir því að verðbólga færi úr 7,0 prósentum niður í 6,6 prósent. Greiningardeildin sagði gjaldskrárhækkanir á opinberri þjónustu nokkra í mánuðinum en bætti því við að lækkanir á ýmsum sviðum taki heildarhækkunina niður. Þá gerði deildin ráð fyrir því að matvöruverð hækkaði í mánuðinum vegna hækkunar hjá birgjum og launahækkana í verslun. Deildin spáði því ennfremur að verðbólgan muni lækka hratt á árinu og verða 2,3 prósent á ársgrundvelli yfir árið í heild.

Verðbólguspá Glitnis

Í verðbólguspá greiningardeildar Kaupþing í byrjun árs var gert ráð fyrir að vísitala neysluverðs myndi hækka um 0,1 prósent á milli mánaða í janúar og muni 12 mánaða verðbólga fara við það niður í 6,7 prósent. Í Verðbólguspá deildarinnar frá miðjum október í fyrra var bent á að draga muni úr eftirspurn í hagkerfinu á næstu mánuðum og muni það skila sér í minni verðbólguþrýstingi. Skatta- og tollalækkanir muni koma inn í vísitölumælingar í mars og apríl og muni verðbólga því lækka mjög skart í kjölfar þess, að sögn greiningardeildar Kaupþings. Þá spáði deildin því að 12 mánaða verðbólgan yfir árið í heild verði um 3,5 prósent.

Verðbólguspá Kaupþings

Greiningardeild Landsbankans áréttaði fyrri verðbólguspá sína í Vegvísinum í gær. Þar var gert ráð fyrir 0,2 prósenta hækkun vísitölu neysluverð sem geri það að verkum að verðbólga lækkar úr 7,0 prósentum í 6,8 prósent. Greiningardeildin sagði erfiðast að spá fyrir um breytingar á matvöruverði enda óvíst hversu hratt hækkanir hjá birgjum um áramótin hafi lekið út í smásöluverð í þessum mánuði. Vegna þessa megi því búast við áframhaldandi lækkun á matvöruverði í næsta mánuði. Deildin spáir því að verðbólga fari skarpt niður í mars vegna skattalækkana og geti hún haldið áfram niður á við í apríl.