Brotist inn í sumarbústað

Lögreglan í Borgarnesi handtók um hádegisbil í dag fjóra einstaklinga um tvítugt sem höfðu brotist inn í sumarbústað í Svínadal í fyrrinótt. Fjórmenningarnir höfðu neytt fíkniefna en lögregla fann á þeim 10 grömm af hassi og eitthvað af alsælu. Fólkið braut rúður til þess að komast inn í sumarbústaðinn og héldu síðan upp á það með partýstandi fram eftir nóttu.

Lögregla segir eftirlit við sumarhúsalönd hafa verið eflt að undanförnu og að það hafi leitt til handtöku fjórmenningana. Ekki var farið inn í aðra bústaði í nágrenninu. Lögreglumenn frá Akranesi aðstoðuðu lögregluna í Borgarnesi við handtökurnar.