Tilboð Nasdaq í LSE rann út í dag

Lokafrestur hluthafa í bresku kauphöllinni í Lundúnum í Bretlandi (LSE) til að taka óvinveittu yfirtökutilboði bandaríska hlutabréfamarkaðarins Nasdaq rann út klukkan eitt í dag. Ekki liggur fyrir hvort hluthafar í LSE hafi tekið tilboðinu, sem er óbreytt frá fyrra tilboði Nasdaq. Síðar í dag verður greint frá því hvort einhverjir hluthafar LSE hafi tekið tilboðinu.

Breskir fjölmiðlar ýja þó að því í dag að ólíklegt sé að hluthafarnir hafi gengið að tilboði Nasdaq þar sem lokagengi LSE í gær var talsvert yfir tilboðinu, sem hljóðar upp á 1.243 pens á hlut. Það jafngildir 2,7 milljörðum punda eða ríflega 367 milljörðum íslenskra króna.

Nasdaq gerði fyrst samhljóðandi yfirtökutilboð í LSE snemma á síðasta ári. Carla Furse, forstjóri LSE, hefur hins vegar ævinlega fellt það á þeim forsendum að tilboðið endurspegli ekki framtíðarhorfur kauphallarinnar og sé því undir raunverulegu markaðsvirði. Í kjölfarið hóf Nasdaq óvinveitt yfirtökuferli í LSE og hafði á haustdögum tryggt sér 28,8 prósenta hlut í LSE.

Í framhaldinu gerði stjórn bandaríska hlutabréfamarkaðarins öðrum hluthöfum í LSE tilboð í bréfin. Upphaflega höfðu hluthafarnir frest fram til loka janúar til að taka tilboði Nasdaq. Skömmu áður en fresturinn rann út var hins vegar ákveðið að færa hann fram til dagsins í dag.