Segja Írana kynda undir ófriðnum

Talsmenn Bandaríkjahers sökuðu í dag Írana um að kynda undir ófriðareldinum í Írak með því að smygla vopnum til uppreisnarmanna í landinu. Lengi hefur verið vitað að írönsk vopn eru notuð til ofbeldisverka í Írak en þetta er í fyrsta sinn sem Bandaríkjamenn saka íranska embættismenn með beinum hætti um að láta uppreisnarmönnum vopn í té. Fram kom í máli þeirra á fréttamannafundi í dag að 170 bandarískir hermenn hefðu látið lífið í árásum þar sem sprengjum af íranskri gerð hafði verið komið fyrir í vegköntum.