Fjölskylda borin röngum sökum í Borgarnesi

Fjölskylda í Borgarnesi hefur leitað ásjár lögreglunnar vegna þess að þar ganga sögur fjöllunum hærra um að lögreglan hafi gert húsleit hjá fjölskyldunni og fundið fíkniefni. Fjölskyldan er sökuð um að stunda fíkniefnasölu og hefur orðið fyrir aðkasti vegna þess.

Skessuhornið, vikublað á Vesturlandi, talaði við Theódór Kr. Þórðarson yfirlögregluþjón, sem segir að lögreglan líti málið alvarlegum augum, enda sé það lögbrot að bera fólk röngum sökum. "Menn hafa verið kærðir og hlotið refsingu fyrir rangar sakargiftir," segir Theódór.

Ekki hefur verið lögð fram formleg kæra í þessu máli ennþá. Lögreglan í Borgarnesi hefur verið ötul við að upplýsa fíkniefnamál á undanförnum misserum, en Theódór segir að engin hjón í Borgarnesi eigi þar hlut að máli.