Fowler vill nýjan samning hjá Liverpool

Enski framherjinn Robbie Fowler vonast til þess að fá samning sinn við Liverpool framlengdan þrátt fyrir að hann fái ekki mörg tækifæri hjá liðinu um þessar undir. Hinn 31 árs gamli Fowler skoraði um síðustu helgi sín fyrstu deildarmörk frá því í ágúst, en hann hefur engu að síður mikla trú á sjálfum sér.

"Það er óvíst hvað framtíðin ber í skauti sér fyrir mig. Ég hef ekki rætt við neinn hjá Liverpool um framhaldið og í augnablikinu er ég bara að einbeita mér að því að standa mig fyrir Liverpool," segir Fowler, en samningur hans við félagið rennur út í sumar.

"Ég mun setjast niður með ráðamönnum félagsins þegar rétti tíminn kemur. Ég er kannski ekki yngsti leikmaðurinn í liðinu en ég er ekki svo gamall heldur. Mér finnst ég geta spilað í nokkur ár til viðbótar og held að ég hafi ýmislegt fram að færa sem leikmaður."