Truflaði guðsþjónustu drottningar

Svartur maður truflaði í dag guðsþjónustu í Westminster Abbey, í Bretlandi, þar sem bæði Elísabet drottning og Tony Blair, forsætisráðherra voru viðstödd. Guðsþjónustan var haldin til að minnast þess að 200 ár eru liðin frá því þrælahald var afnumið í Bretlandi.

Toyin Agbetu spratt á fætur úr sæti sínu og hljóp upp að altarinu, aðeins nokkra metra frá drottningunni. Þar hrópaði hann til svartra safnaðarmeðlima; "Þið ættuð að skammast ykkar, þetta er móðgun við okkur."

Öryggisverðir fjarlægðu Agbetu úr kirkjunni og lögreglumenn yfirheyrðu hann. Talsmaður lögreglunnar sagði að hann hefði verið handtekinn fyrir óspektir.