Mikill fjöldi erlendra ferðamanna á Íslandi yfir páskana

Það eru ekki eingöngu Íslendingar sem kjósa að leggja land undir fót hérlendis eða erlendis yfir páskahátíðina. Erlendir ferðamenn kjósa í síauknum mæli að nota hátíðina til stuttra Íslandsferða.

Hildur Ómarsdóttir markaðsstjóri Icelandair Hotels segir bókanir ferðamanna berist með sífellt styttri fyrirvara og að hlutfall netbókana hafi aukist um allt að 100% milli ára. Greinilegt sé að fólk sé orðið mun sjálfstæðara og hvatvísara í ferðakaupum nú en áður en fari oftar í styttri ferðir.

Drífa Magnúsdóttir verkefnisstjóri Upplýsingamiðstöðvar ferðamanna í Reykjavík segir að páskahelgin sé alla jafna mjög erilsamur tími í stöðinni, mikið sé um ferðamenn sem komi á eigin vegum og vilji skipuleggja gang ferðarinnar eftir að til landsins sé komið. Ferðaþjónustan á höfuðborgarsvæðinu er nú að vakna af vetrardvala, hvalaskoðun hjá nýju fyrirtæki í Reykjavík, Reykjavík hvalaskoðun, hefst á morgun auk þess að allt árið er boðið uppá ýmiskonar göngu-, jeppa- og rútuferðir. Í upplýsingamiðstöðinni geta ferðamenn bæði innlendir og erlendir fengið upplýsingar um afþreyingu ýmiskonar og aðstæður til ferðalaga um landið allt, bókað og keypt ferðir.

Upplýsingamiðstöð ferðamanna í Reykjavík er sú langstærsta á landinu og þess má geta að gestafjöldi á liðnu ári í miðstöðina var tæplega 240 þúsund manns sem 24% aukning frá árinu 2005.

Upplýsingar um opnunartíma yfir páskahátíðina hjá ferðaþjónustuaðilum, veitingastöðum, söfnum, sundlaugum, kaffihúsum o.fl. má finna á vefsíðunni www.visitreykjavik.is