Frítt áfengi í unglingasamkvæmi

Um klukkan 11 í gærkvöldi fékk lögreglan á höfuðborgarsvæðinu tilkynningu um að frítt áfengi væri veitt í samkvæmi fyrir 16 ára unglinga í heimahúsi á Laufásvegi. Lögreglan fór á staðinn og hitti fyrir um 100 ungmenni á aldrinum 14-18 ára. Þau sögðust hafa borgað þúsund til fimmtán hundruð króna aðgangseyri. Partýhaldarinn var 15 ára stúlka. Hún var afar ölvuð.

Fleira lögreglulið var kallað til og tók á aðra klukkustund að tæma húsið. Einungis klukkustund síðar var aftur hringt og kvartað undan látum í húsinu. Húshaldarinn ungi var ekki á þeim buxunum að hætta og var kominn með 20 manns í samkvæmið á ný.