Saha fer ekki með til Rómar

Franski framherjinn Louis Saha fer líklega ekki með Manchester United til Rómar þar sem enska liðið spilar fyrri leik sinn við Roma í fjórðungsúrslitum Meistaradeildar Evrópu á miðvikudagskvöldið. Saha er nú óðum að ná sér eftir fimm vikna fjarveru vegna meiðsla á læri.

Búist er við því að Saha gæti spilað með varaliði United sem mætir Blackburn annað kvöld. Þá er miðjumaðurinn Darren Fletcher á góðum batavegi eftir ökklameiðsli sem hann varð fyrir í bikarleik gegn Reading í febrúar og gæti jafnvel komið inn í hópinn fljótlega.