Crouch: Við erum að toppa á réttum tíma

Peter Crouch skoraði þriðja og síðasta mark Liverpool í kvöld þegar liðið burstaði PSV Eindhoven 3-0 í 8-liða úrslitum Meistaradeildarinnar og komst í mjög vænlega stöðu fyrir síðari leikinn. Crouch sagði sína menn hafa virkað mjög ferska í kvöld og telur liðið vera að toppa á hárréttum tíma, en fyrirliðinn Steven Gerrard vill ekki fara að hugsa um næstu umferðina strax.

"Kannski erum við bara að ná okkar besta á réttum tíma. Það er kannski vegna þess hve þjálfarinn er duglegur að skipta leikjunum á milli manna, en mér fannst allir strákarnir mjög ferskir í leiknum í kvöld. Við erum allir í sjöunda himni," sagði Crouch.

"Ég vissi að við værum í góðum málum eftir að við skoruðum fyrsta markið og eftir það var þetta bara spurning um að halda áfram að gera það sem við lögðum upp með að gera fyrir leikinn. Við erum ekkert farnir að hafa áhyggjur af næstu umferð keppninnar því við eigum eftir að spila 90 mínútur enn. Þegar þær eru búnar, getum við farið að spá í það hvort við mætum Chelsea eða Valencia," sagði fyrirliðinn Steven Gerrard.