Arabar kaupa þotur frá Airbus

Flugfélagið Emirates hefur pantað fjórar A80 risaþotur frá Airbus. Með nýju pöntuninni hefur flugfélagið pantað 47 risaþotur af þessari gerð, sem er sú stærsta í heimi og kemur á markað síðar á þessu ári.

Verðmæti samningsins nú nemur 1,22 milljörðum bandaríkjadala, jafnvirði 77,57 milljarða íslenskra króna. Gert er ráð fyrir að flugfélagið fái fyrstu farþegaþoturnar í hendur snemma á næsta ári.

Að sögn breska ríkisútvarpsins er Emirates einn mikilvægasti kúnni Airbus enda stærsti kaupandi á þessum risaþotum félagsins.

Airbus hefur átt við talsverðan rekstrarvanda að stríða vegna tafa á framleiðslu á risaþotunni og hefur vegna þessa þurft að segja upp 10.000 manns í nokkru Evrópulöndum og endurskipulagt framleiðsluferlið.