Kallað eftir ljósmyndum frá Praia de Luz

Breska lögreglan hefur biðlað til almennings um að fá sendar myndir af sumarleyfisstaðnum Praia de Luz og nágrenni í Portúgal. Óskað er eftir myndum á tölvutæku formi frá tveggja vikna tímabili áður en Madeline McCann var rænt þann 3. maí. Helst eru það myndir með ókunnugum í bakgrunni sem lögreglan er á höttunum eftir.

Ekki er óskað eftir fjölskyldumyndum eða landslagsmyndum án fólks. Myndunum verður rennt í gegnum tölvuforrit sem ber kennsl á andlit miðað við gögn um grunaða frá lögreglu. Samkvæmt fréttavef Sky verða myndirnar einnig bornar saman við upplýsingar af breskum barnaníðingum og glæpamönnum.

Sérstök vefsíða hefur verið sett á laggirnar til að taka á móti myndunum.

Í dag var mínútu þögn víða í Portúgal vegna hvarfsins á Madeleine. Kate McCann móðir hennar fylgdist með þögninni og baðst fyrir í 45 mínútur í nálægri kirkju.

Faðir Madeleine, Gerry, fór í morgun í stutta heimsókn til Bretlands til að ganga frá ýmsum málum vegna hvarfs dóttur hans.

Nú eru 18 dagar síðan Madeleine hvarf og ekkert hefur spurst til hennar síðan.