General Motors krafið gagna

Bandaríska fjármálaeftirlitið hefur óskað eftir gögnum um síðasta ársuppgjör bandaríska bílaframleiðandans General Motors. Fyrirtækið segir að búist hafi verið við þess að eftirlitið myndi óska eftir gögnunum.

Þetta er ekki í fyrsta sinn sem eftirlitið knýr dyra hjá bílaframleiðandanum en fyrr á þessu ári fór það fram á gögn vegna tafa á birtingu ársuppgjörsins hjá General Motors.

General Motors hefur unnið að mikill hagræðingu í rekstri síðan í fyrra en þá tapaði fyrirtækið tveimur milljörðum bandaríkjadala, jafnvirði 124 milljarða íslenskra króna. Félagið skilaði hins vegar hagnaði upp á 950 milljónir dala, jafnvirði 59 milljarða króna, á fyrstu þremur mánuðum þessa árs.

Gengi bréfa í bílaframleiðandanum lækkaði um rúmt prósent á markaði í Bandaríkjunum eftir að greint var frá rannsókn fjármálaeftirlitsins og stendur það nú í 30,98 dölum á hlut.