Skoða sölu á Dow Jones

Bandaríska Bancroft-fjölskyldan, sem á meirihluta í útgáfufélaginu Dow Jones og gefur meðal annars út samnefnda fréttaveitu og dagblaðið Wall Street Journal, segist munu hugleiða yfirtökutilboð fjölmiðlajöfursins Ruperts Murdoch í félagið. Hún muni sömuleiðis skoða önnur tilboð.

Rupert Murdoch, forstjóri fjölmiðlasamsteypunnar News Corporation, lagði fram fimm milljarða dala, um 320,7 milljarða króna, yfirtökutilboð í bandaríska útgáfufélagið í byrjun maí. Fjölskyldan, sem í krafti eignahlutar síns fer með 64 prósent atkvæðaréttar, hefur verið sögð mótfallin tilboðinu. Enginn í fjölskyldunni hefur hins vegar tjáð sig opinberlega um málið þar til í vikunni.

Í tilkynningu sem Bancroft-fjölskyldan sendi frá sér segir að hún hafi sæst á að hag Dow Jones geti verið betur borgið með samvinnu eða samruna með öðrum samsteypum, þar á meðal New Corporation.