Middlesbrough vill Grétar Rafn

Enska liðið Middlesbrough ætlar sér að gera tilboð í Grétar Rafn Steinsson, leikmann AZ Alkmaar og íslenska landsliðsins. Þetta kemur fram á fréttavef Skysports í morgun.

Samkvæmt fréttinni er Gareth Southgate að leita sér að hægri bakverði eftir að hafa misst frá sér tvo menn í þeirri stöðu. Hann á að hafa haft samband við AZ Alkmaar til þess að athuga hvort að Grétar Rafn sé til sölu. Grétar Rafn kom til AZ sumarið 2005 og í fréttinni segir að hann sé þegar orðinn lykilmaður í liði Louis van Gaal. Þá er haft eftir umboðsmanni Grétars Rafns að hann hafi áhuga á því að spila á Englandi. Talið er að AZ eigi eftir að biðja um fjórar milljónir punda fyrir Grétar Rafn.