Réðust að leigubílstjóra

Tveir ölvaðir menn brugðust ókvæða við þegar leigubílstjóri ætlaði að sækja þá í Lækjargötu í Reykjavík í nótt. Mennirnir höfðu beðið um Benz eða Lincoln bifreið en fengu næsta bíl. Þegar bíllinn kom á staðinn spörkuðu þeir í hann og skemmdu talsvert. Annar mannanna sló til bílstjórans þannig að gleraugu hans brotnuðu, en hann sakaði ekki.

Að því búnu lögðu þeir á flótta en lögregla handtók þá á veitingastað skömmu síðar og vistaði þá í fangageymslum. Þeir verða yfirheyrðir í dag. Tjónið á bílnum er talið vera á bilinu þrjú til fjögur hundruð þúsund.