Spá mikilli aukningu í sölu farþegaþota

Bandarísku flugvélasmiðjur Boeing spá því að sala á farþegaþotum eigi eftir að margfaldast á næstu 20 árum frá fyrri spá. Þeir gera hins vegar ráð fyrir minni eftirspurn eftir risaþotum, sem eru fyrir fleiri en 400 farþega. Gangi spáin eftir eru það ekki góðar fréttir fyrir Airbus en risaþota flugfélagsins tekur um 555 farþega og er á tveimur hæðum.

Boeing hafði gert ráð fyrir að það myndi selja farþegaþotur fyrir 200 milljarða bandaríkjadala, jafnvirði rúmra 12.700 milljarða króna, á næstu 20 árum en spáir því nú að vegna aukinnar eftirspurnar muni salan nema heilum 2.800 milljörðum dala. Þetta er tífalt meiri sala en fyrri spá flugvélasmiðjanna hljóðaði upp á.

Samhliða þessu endurskoðaði Boeing spá sína um sölu á stærri farþegaþotum. Hafði það á síðasta ári gert ráð fyrir að selja 990 slíkar vélar en telur nú að þær verði 30 fleiri vegna minni eftirspurnar.

Þá spá flugvélaframleiðendurnir því að beinum flugleiðum muni fjölga. Það komi farþegum til góða þar sem þeir þurfi ekki að millilenda á ferðum sínum.

Þá gera flugvélaframleiðendurnir ráð fyrir því að þriðjungur af sölu á nýjum flugvélum muni verða á nýmörkuðum, svo sem í Asíu.

Dreamliner 787 farþegaþota Boeing kemur á markað á næsta ári og gera flugvélaframleiðurnir ráð fyrir góðri sölu á henni.

Gangi spáin hins vegar eftir um minni eftirspurn eftir risaþotum eru það miður góðar fréttir fyrir evrópsku flugvélasmiðina hjá Airbus. Risaþota fyrirtækisins, A380, er tveimur árum á eftir áætlun og hefur valdið EADS, móðurfélagi fyrirtækisins, talsverðum vandræðum. Gert er ráð fyrir að fyrsta vélin verði afhent í vetur.