Houston og Minnesota að skipta á leikmönnum

ESPN sjónvarpsstöðin greindi frá því í gærkvöld að Houston Rockets og Minnesota Timberwolves væru búin að samþykkja skipti á leikmönnum sem færu væntanlega fram á næstu dögum. Minnesota mun senda bakvörðinn Mike James til Houston í skiptum fyrir hinn reynda framherja Juwan Howard. Til greina kemur að fleiri leikmenn skipti um heimilisfang í viðskiptunum þegar að þeim kemur.

Miklar vonir voru bundnar við komu James til Minnesota fyrir síðustu leiktíð, en hann náði sér aldrei á strik og skilaði um 10 stigum í leik að meðaltali eftir frábært tímabil með Toronto árið áður. Howard er reyndur kappi sem hefur komið víða við á löngum ferli en hann skilaði Houston um 10 stigum og 6 fráköstum í vetur.