Olíufundur við strendur Ghana

Breska olíufélagið Tullow Oil greindi frá því í dag að það hefði fundið geysistórar olíulindir á svokölluðu Mahogany-svæði undir ströndum Afríkuríkisins Ghana. Talið er að lindirnar geti gefið af sér 600 milljónir tonna af hráolíu, sem er rúmlega tvöfalt meira en olíufélagið hafði gert ráð fyrir.

Gengi hlutabréfa hækkaði um 10 próent í kjölfar fréttanna.

Aidan Heavey, forstjór Tullow Oil, segir í samtali við breska ríkisútvarpið að um tilraunaboranir sé að ræða og eigi enn eftir að kanna önnur svæði í námunda við staðinn þar sem olíulindirnar eru taldar vera. Þetta er stærsti olíufundur í Afríku, að hans mati. Olíufundurinn mun ekki hafa mikil áhrif á olíubirgðir helstu þjóða í bráð því olíuvinnsla hefst ekki á svæðinu fyrr en í fyrsta lagi eftir sjö ár.

John Kufuor, forseti Ghana, er þess hins vegar fullviss að olíufundurinn muni gera mikið fyrir hagkerfi Ghana enda sé samasemmerki á milli olíu og peninga. „Við þurfum peninga fyrir menntakerfið, samgöngur og sjúkrahús," segir hann.