Hunter bætir á sig garðvörubréfum

Fjárfestingafélag skoska auðkýfingsins Sir Tom Hunters hefur aukið á ný við hlut sinn í skosku garðvörukeðjunni Dobbies og fer nú með 21,4 prósent í henni. Kaupverð hlutanna nemur 1,46 milljónum punda, rúmum 180 milljónum íslenskra króna. Með kaupum í keðjunni stefnir Hunter að því að Tesco, stærsti stórmarkaður Bretlands, yfirtaki hana.

Hunter hefur jafnt og þétt aukið við eign sína í Dobbies. Hann tvöfaldaði eignasafn sitt í garðvörukeðjunni í byrjun síðustu viku og fór með rúm 20 prósent þar til í gær þegar hann keypti 0,81 prósent til viðbótar.

Hann greiddi 1800 pens fyrir hlutinn, að sögn vefmiðilsins Retail Bulletin.

Breski stórmarkaðurinn Tesco gerði yfirtökutilboð í Dobbies fyrir rúmri viku upp á 155,6 milljónir punda, rúma 19,7 milljarða íslenskra króna. Gangi kaupin í gegn verða þetta fyrstu skref stórmarkaðarins utan matvörugeirans. Hunter hefur hins vegar verið á móti yfirtökunni og fengið fjölda fjárfesta til liðs við sig til að komast yfir fjórðungshlut hið minnsta en það dugir til að hindra yfirtökuna.

Á meðal þeirra sem orðaðir hafa verið við kaup í Dobbies ásamt Hunter er Baugur, Kevin Stanford og fleiri en Hunter er náinn viðskiptafélagi Baugs Group. Þá hefur Kaupþing í Bretlandi stutt við fjárfestingar skoska auðkýfingsins.

Fjárfestingafélag Hunters tók þátt í kaupunum á House of Fraser ásamt Baugi, FL Group og fleiri fjárfestum. Þá keypti það með Baugi og fleirum garðvörukeðjuna Wyevale Garden Centres í fyrra fyrir jafnvirði fjörutíu milljarða króna og Blooms of Bressingham á þessu ári.